شوية هياس تقدم : أغاني الثورة ... آه يا وداني أرجع يا ريس تاني



أموت واعرف بتعيط بجد ولا بتهزر معانا



طبعاً نتيجة الفراغ اللي كان مالي حياتنا أيام الثورة ومسك الرموت اللي كان ناقص يشتكي ويصرخ ويقول أرحمني أبوس صابعك ، قادنا الفراغ الي اننا نسمع كمية أغاني للثورة لا تعد ولا تحصي وكأن في مأسورة أغاني وانفجرت في التلفزيون..!!  كل واحد صوته حلو ولا حتي فاكر ان صوته حلو بيتبع خطوات ثابتة ومعروفة وهي يخد الفرقة ويطلع علي أول استديو و يسجل و أسمع انت يا برنس  ..!!

وطبعا كعادة المصريين انقسم المطربين واشباه المطربين قسمين فريق فضل الغم والنكد وحب يخلي  شركات المنديل الكيلانكس تكسب  فاغانيهم كلها كانت عن الشهداء والجراح والألام اللي كانت في الثورة وحط يا معلم كام صورة من هنا علي كام فيديو من هناك  يخليلوك  تسح ونجيب من عنيك ..الله يكون في عون اللي عندهم باركيه  ..!!

أما الفريق التاني فحب التطبيل والتصفيق في دم معظمهم  وقالك انا أغني للتفاؤل أحسن ويا عم نحزن أيه ده الحزن مش بالأغاني الحزن في القلب يا كبير  وسؤاء انت عيط او اتفائلت فانت اكيد سمعت كمية أغاني ولا ليها اي لزمة ولا ليها مكان غير صفايح زبالة الاستديوهات ..!!

القائمة طويلة وعريضة وبصراحة انا مش عاوز انسي فذة من الفذائذ اللي غنوا الأغاني المفزعة اللي قال ايه انها أغاني ثورية .. يا أخي ديه دا ..!!

أول مطرب عجيب من نوعه طلع علينا في أيام الثورة كان المطرب العظيم صاحب الغدد الغنائية السوداء " إيهاب توفيق" ..  إيهاب توفيق  يا أخونا طلع علينا في أغنيته المبهمة الملامح بجملة غريبة انا حتي الآن  مش قادر افسر معناها والنبي اللي يقدر يفسرها  يبعت لينا وميخجلش يعني  يمكن ربنا يمن علينا بالفهم والجمل العجيبة بتقول "يالا نرجع مصريين" ها هل من مفسر ؟ طبعا لا وكلنا طبعا دلؤقتي نفسنا نسأل عمنا إيهاب  سؤال وهو طبعا هو احنا كنا قبل الثورة ايه ومنين  يا عم إيهاب  ؟ كنا موزبقيين من جزر الفلببين مثلاً وطبعا انا نفسي متأكد ان"أوبة"  نفسه ميعرفش الإجابة ..!!

نرجع تاني لمرجعنا الأغاني ونجي لأغنية أكتشف بيها صاحبها أكتشاف تحدي بيه أكتشاف نيوتين للجاذبية اللي هو أن "البلد بلدنا"  بجد ازهلني بالأكتشاف وطبعا التفسير المنطقي الوحيد للجملة دي أن المطرب صاحب الحنجرة النحاسية "هشام عباس"  أكتشف عقد ملكية مصر فعرف في نهاية الأمر ان البلد بلدنا وفرح بالأكتشاف العظيم ده وقرر انه يقرف ودننا بكلام مبتذل ولكي الله يا وداني...!

 

أما المطرب المجهول الفكر والهوية محمد حماقي فلخص حاله المايل في جملة في أغنيته لما قال "مصر عايزه الشغل مش عايزه الأغاني" وطبعا انا في سؤال محشور في زوري للأستاذ حماقي انت بتعمل ؟ مش بتغني ؟ فهمني طبعا مفيش إجابة كالعادة ..!!

وطبعا مش حتكلم علي أغنية حمادة هلال اللي نالت نصيب الأسد من التهزيق لحد ما الأغنية اتهرست واتفرمت من كتر التئليس وبرغم كده لقيته قايل في حوار معاه انه عندليب الثورة ..... وانا من هنا بقول لحمادة كفاية "ألش"  بجد حراااااااااااااااااااااام ..!!

إما اخونا توتو عضلات محمد نور فالاخت الفاضلة مني هلا قامت بالواجب وزيادة حبتين ونصحتي ليه انه يشتغل مدرس لغة عربية...   ده لم موضوع أغنيته حقك علينا يا جماعة بكسر القاف...!!

وطبعا مش حننكر دور المطرب الرائع دائما مصطفي قمر في خدمة الثورة لدرجة انه علق في أغنيته علي جملة واحدة مفيش غيرها  "اعلى يا مصر على اللى بيحصل ده وخطيه.. ده انتى كبيرة وكل كبير الناس بتبص عليه" حوالي ثمن مرات يقول نفس الجملة غير دخلة الأغنية اللي تجيب صرع لوحدها

والمصيبة لما مطرب يغيب يغيب ، ويروح ويقول عدولي ويرجعلك بأغنية ملهاش لزمة والأدهي انها وطنية وطبعا عرفتم قصدي مين مطرب الحركات والتعبير الإيقاعي بهاء سلطان ومشكلة أغنية بهاء سلطان اللي أسمها انتي الغالية يا بلادي انها بتدخلنا في مشاكل عائلية ملناش دعوة بيها ، يعني لما يقولك " وياما زعلت أمي" الناس حتفهم ايه يعني غير انه بيتهم علي طول قايد نار بسبب شقاوة بهاء وغضب طنط عليه ..!!

وطبعا الأغنية بتسيء لسمعة بيت عم سلطان وبتتهمه اتهام صريح بالتفكك الأسري ..!!

وسيبك بقي من ده كله ، في كام أغنية طلعت كده  الرغبات النفسية المدوفنة جوه المطربين فالهضبة عمرو دياب باغنيته "مصر قالت" علي طول تحسسك انه كان نفسه يطلع صحفي ، والكينج منير بأغنيته "ازاي"  تفهم علي طول انه كان حيموت ويطلع وكيل نيابة  أما محمود العسيلي اللي حتي الآن نفسي أفهم خامة صوته بينتمي لأي نوع من الأصوات الغنائية،  العسيلي يا جماعة جاب من الأخر وسمي أغنيته أجزاخانة طبعا كان نفسه يطلع صيدلي ، وطبعا مش حعبر الشخص اللي طلع وغني هو ومرضعة قلاون اللي كانت  معاه دي أغنية " حلوة بلادي السمرا" وطبعا بحنجرته دي شوه سمعة مصر ، وأحب أقول ليهم بس جملة واحدة اللي يحب مصر ميخربش مصر...!!

القائمة طويلة جداا واكيد في عاهات تانية كتير بس الأكيد اننا بنعاني مش مشكلة غنائية كبيرة وهي مشكلة أغنية الحدث ومش الأغنية اللي تسمع  مع الناس عشان مشاعرك حست بيها ، كل الفنانين قبل الثورة كانوا بيغنوا للنيل والهرم والنخيل اللي يخليك تحس  انهم فنانين تشكيليين عباقرة مش بس مطربين ..!!  وطبعا ملناش دعوة بأغاني الريس واوبريتات حفلات نصر أكتوبر بجد احنا محتاجين مؤلفين يستعبوا التغير اللي حصل في البلد وعقلية الناس  ويفهموا ان الغناء مش بس فن خاص بالسمع لا ده كمان ده فن قلوب وعقول وبعد كده يجي دور الملحن والمطرب ومن هنا لحين اللقاء التاني من مقالات شوية هياس انتمني ان  مفيش مطرب حنجرته تخونه

ويطلع بأغنية جديدة عن الثورة ...!!!